ಕನಸು ಸಮಾಜ

ಮನದ ಮೂಲೆಯಲಿ ನೂರು ಆಸೆಗಳ ಚಿಗುರು,

ಹೊಸತು ಏನನ್ನೋ ಮಾಡುವ ಹಂಬಲದ ಕುಮ್ಮಕ್ಕು;

ಆದರೆ ಸುತ್ತಲೂ ಮೌಢ್ಯದ ಕವಚದ ಅಬ್ಬರ,

ನನ್ನ ರೆಕ್ಕೆಗಳ ಕತ್ತರಿಸಲು ನಿಂತಿದೆ ಈ ಲೋಕದ ಚದುರಂಗದ ಆಟ!

ನನಗೆ ಹಾರುವ ಆಸೆ ಆಕಾಶಕ್ಕೆ ಮುತ್ತಿಡಲು,

ಇವರು ಎಳೆಯುವರು ಕಾಲು ಹಿಂದಕ್ಕೆ ಎಡವಲು;

ನನ್ನ ಕಲ್ಪನೆಯ ಲೋಕಕ್ಕೆ ಬಣ್ಣ ಹಚ್ಚುವ ಮುನ್ನ,

ಇವರು ಸುರಿಯುವರು ಟೀಕೆಯ ಕಪ್ಪು ಮಸಿಯನ್ನ!

"ಇದು ಸರಿಯಲ್ಲ", "ಅದು ನಡೆಯಲ್ಲ" ಎಂಬ ಉರುಳು,

ನನ್ನ ಸುಂದರ ಕನಸುಗಳಿಗೆ ಮಸಣದ ದಾರಿ;

ಮಾತಿನ ಮಲ್ಲರು ಇವರು, ಮನದ ನೋವಿಗೆ ಕುರುಡರು,

ನನ್ನ ಆತ್ಮಾಭಿಮಾನಕ್ಕೆ ಸದಾ ಎದುರಾಗುವ ವೈರಿಗಳು.

ಕುಗ್ಗಿ ಹೋಗಿದೆ ಮನಸ್ಸು ಈ ಬಂಧನದ ನಡುವೆ,

ಹೃದಯದ ಚೀರಾಟ ಕೇಳದ ಮೌನ ಕಣಿವೆಯಲಿ;

ಬರೆಯಲು ಹೋದ ಪದಗಳು ಕಣ್ಣೀರಾಗಿ ಹರಿಯುತ್ತಿವೆ,

ನನ್ನ ಆಸೆಗಳು ಇವರ  ಕಲ್ಲಿನ ಹೊಡೆತಕ್ಕೆ ನಲುಗುತ್ತಿವೆ.

ಆದರೂ...

ಒಂದು ದಿನ ಈ ಮೌನವೇ ಗುಡುಗಾಗಿ ಸಿಡಿಯಬಹುದು,

ಜನರ ಬೇಲಿ ದಾಟಿ ನನ್ನ ಕವಿತೆ ರೆಕ್ಕೆ ಬಿಚ್ಚಬಹುದು;

ಅಲ್ಲಿಯವರೆಗೆ ಈ ನೋವು ನನ್ನ ಲೇಖನಿಯ ಮಸಿ,

ಬದುಕು ಬರಿದಾದರೇನು, ಕಲೆಗಿರಲಿ ಹೊಸ ಖುಷಿ!  

-ದ್ಯಾವನೂರು ಮಂಜುನಾಥ್